إهداء إلى أمى الغالية ....

وحشتينى جداً جداً محتاجة اشوفك قوى واقعد اتكلم معاكى زى زمان لما كنت اجى افضفض معاكى وانت بتسمعينى وبتغسلى كل همومى بمجرد ابتسامة منك ومسحة بإيدك على شعرى وبتهونى عليه كل الضيق والحزن اللى بحس بيه كنت دايما بمجرد الكلام معاكى بنسى كل اللى انا فيه او بحس بيه وجودك كان فارق معايا قوى فى كل حاجة ماكنتش بشيل هم اى حاجة بالعكس كانت كل حاجة بتهون مهما كانت عظيمة لمجرد انى حاسة انك موجودة معايا او جانبى اما دلوقت مش بلاقى حد اتكلم معاه واذا وجدت اشخاص اتكلم معاهم مش بحس بنفس الراحة اللى كنت بحسها معاكى لإنك الوحيدة اللى كنت بتستحملينى حتى لو انت تعبانة كنت بتخففى عنى من غير ما تضايقى .
هذا البوست إهداء إلى أمى فى عيد الأم .
الله يرحمها ويسكنها فسيح جناته ويجمعنى بها على خير .

ماتحسبوش يا بنات ان الجواز راحة .......

قبل ما اكتب البوست ده حبيت اعرفكم سبب تسمية المدونة ( ام البنات ) انا اتجوزت من 6 سنين وربنا رزقنى ببنت اول ما تجوزت وبعد 4 سنين حبينا نجيب لها اخ او اخت يونسوها ربنا رزقنا ببنتين توأم من حوالى 6 شهور وفجأة لاقيت زوجى العزيز بيقترح عليه ان احنا نجرب موضوع الخلفة ده تانى يمكن ربنا يرزقنا بولد طبعا انا سمعت كده كان هايغمن عليه بس تخطيت الصدمة بسلام وعرضت عليه انه يروح يتجوز واحدة تانية يجيب منها الولد لكن انا مش هافكر فى الموضوع ده تانى لإن ببساطة ربنا لو كان عايز يرزقنا بولد كان رزقنا به فى اى مرة من المرتين او على الأقل فى المرة التانية بدل ما رزقنا ببنتين مرة واحدة كان رزقنا بولد وبنت واغلقت الكلام فى الموضوع ده خالص وده كان السبب اللى خلانى اسمى المدونة بهذا الاسم بالغيظه فى جوزى .

ماتحسبوش يا بنات ان الجواز راحة .......

معظم البنات قبل ما تتجوز بتبقى فاكرة انها لما تتجوز هاترتاح وانا كنت من ضمن البنات دول وبقول انا كنت لإنى والحمد لله ربنا كرمنى واتجوزت . كنت فاكرة انى لما اتجوز هاعيش حياتى زى ما كنت بتخيلها حياه خالية من المشاكل العويصة اللى مش ليها حل ما هى المشاكل نوعين مشاكل مقدور عليها وهى المشاكل اليومية اللى بيتعرض لها كل بيت فى مصر يعنى بتبقى عادية ( مصروف البيت – مستلزمات الأولاد ومشاكلهم ) والمسئولية اللى بيشلها أى اتنين بيتجوزوا والنوع التانى من المشاكل بعيد عنكم وعن السامعين والقارئين مش بيبقى لها حل ودى بتكون متمثلة فى طبع الرجل اللى متجوزاه لإنك اذا متعودتيش على طبعه واتأقلمتى عليه مش هاتقدرى تكملى معاه ومن ضمن هذه المشاكل إصابة الرجل بداء معين مثل ( الكدب – الإسراف – عدم اكتفائه بزوجته - .....) ويا سلام لو ربنا قدر لك انك تتجوزى واحد عنده عقدة انه كان بيحب واحدة وسابته بتبقى كارثة وذلك على سبيل المثال لا الحصر نبدأهم داء داء :
الكدب : الرجل اللى عنده داء الكدب بيخلى حياة زوجته جحيم لإنها بتفقد الثقة فى كلامه حتى لو بيقول الصدق لأنها كانت بتصدقه فى اول جوازهم ولما بينكشف لها كدبه اكتر من مرة خلاص بقى مش بتصدقه تانى والمصيبة انه بيبقى عارف انها عارفة انه بيكدب ومش مصدقاه وعلى الرغم من كده بيستمر فى كدبه وطبعا هى عايشة فى جحيم لأنها بتبقى عارفة انه بيكدب عليها وبتضطر انها تطنش وتعمل مصدقاه علشان تخف من كم المشاكل اللى بيسببها اكتشافها لكدبه لإن هو كرامته بتوجعه اوى لما يعرف ان مراته كاشفه كدبه وللأسف الداء ده مش له علاج وإلا كانت فى زوجات كتير عرفت تعالج ازواجها .
الإسراف : والداء ده للأسف برضه مش له علاج لإن الزوج بيبقى مسرف فى الحاجات اللى تخصه بس يعنى مثلاً عجبته حاجة وعايز يشتريها عنده استعداد يستلف لو مش معاه تمنها علشان يجبها لكن لو زوجته طلبت منه شئ عندها تظهر الأمثال الشعبية اللى بنسمعها كلنا فى الأوقات اللى زى دى مثلاً ( العين بصيرة والإيد قصيرة – واللى مايشوفش من الغربال يبقى اعمى – الجملة المشهورة قوى من كل الأزواج انا نفسى اجيب لك كل حاجة بس على يدك اعمل ايه اسرق يعنى ..... ) وجمل كتير فى هذا الإطار .
نيجى بقى لأكبر كارثتين ممكن تتعرض ليهم البنت لما تتجوز وهما عدم اكتفاء الرجل بزوجته او يكون كان بيحب واحدة وسابته وهو ماقدرش ينساها والحياة الزوجية لو تعرضت للمشكلتين دول بتبقى على كف عفريت وبتبقى عايزة نوع خاص من النساء علشان تعدى بالبيت لبر الأمان لإن الراجل مش بيبقى فارق معاه خراب البيت لإنه لو كان بيفكر فى البيت مش كان عمل كده من اساسه . لكن نقول ايه رجاله مريضة بعيد عنكم .
وبتبقى صدمة العمر بالنسبة للزوجة وخصوصا اذا اكتشفت ان زوجها بيخونها مع واحدة تانية ولسه ماعداش على جوازهم اكتر من سنة حتى لو كانت الخيانة دى عن طريق التليفون ( يكون بيكلم واحدة فى التليفون وما الى ذلك ) تلاقى الرجل من دول اذا ربنا شاء انه يكشف امره لزوجته وتيجى تواجه تلاقيه بقى 75 رجل فى بعض من زعيق وانفعال واستنكار من ازاى تفكر بس مجرد تفكير انه بيعمل حاجة زى كده .
وتلاقى الرجل من دول مش بيعجبه العجب ولا الصيام فى رجب اذا زوجته دققت على كل حاجة فضلت تسأل على كل حاجة ما هى طبعا فقدت الثقة فيه تبقى بتخنقه واذا فوضت امرها لله وكبرت دماغها واستعوضت ربنا فى عمرها تجنبا للمشاكل تبقى كبرت دماغها عنه وبقى مش فارق معاها بس الزوجة اذا كانت بتعمل كده فده لأنها مش ناقصة مشاكل كفايه اللى عندها ولما يكون الرجل بيقول ان لو هو مش عايز يبطل الموضوع ده من نفسه يبقى مافيش حد هايقدر يخليه يبطله يبقى المطلوب من الزوجة انها تعمل ايه بقى ؟؟؟ كفاكم الله شر هذا النوع من المشاكل.

إلى عالم المدونات

اول مـرة ادخـل عـالم المـدونات وافكـر اعمـل مدونـة اعـرض فيهـا يوميـاتى مع زوجى العزيز لسببين الأول : إنى احيان كتير بامسك ورقة وقلم وافضل اكتب كل اللى بحس به وفى الآخر اما باحتفظ باللى كتبته فى الدرج ومش بستفيد من كتابته حاجة او بقطع الورق اللى كتبته .
اما الثانى : فلإنى ماليش اصدقاء اقدر اتكلم معاهم عن حياتى او يومياتى بشكل اقدر استفيد منه خبرات .
فلذلك قررت انى اعمل مدونة اكتنب فيها كل ما يجول فى خاطرى عن اى شئ سواء كان عن حياتى الشخصية او المشاكل اللى بتعرض لها فى يومياتى .
لعلى اكتسب صداقات جديدة استفيد من خبراتها فى الحياة و استفيد من آرائها اذا ما احتجت استشارة احد فى اى مشكلة .
ممكن كتير يستغربوا من اسم المدونة ( ام البنات ) لكن ده ليه سبب هتعرفوه بعد كده من خلال الكتابات اللى هاكتبها ان شاء الله وعلى فكرة انا عمرى مش كبير قوى انا عندى 33 سنه ومتجوزة بقالى 6 سنين.
ارجو انى ماكنش طولت عليكم وياريت تتقبلونى عضوة فى هذا العالم.