وماذا بعد ذلك ....

ماذا بعد ذلك ايه اللى ممكن يحصل تانى ايه اللى ممكن يكون تانى تحملت اكثر من اللازم وتحملت أكثر مما يجب تحمله ولا يوجد شئ يعطى نتيجة كل النتائج صفر ولا يوجد حتى واحد بس لايوجد للأسف كل الأمور تعطى نفس النتيجة ما هذه الحياه هذا السؤال تردد كثيراً داخلى ولا أجد له إجابة مش عارفة أعمل ايه بعد كده مش عارفة ولا حتى عارفة آخذ قرار الحقيقة واضحة أمامى وضوح الشمس ومع ذلك بحاول أغمى عينى وأعمل نفسى مش شايفة الحقيقة أنا عارفة إن كل اللى أنا بعمله ده حلاوة روح ليس إلا لزيادة مدة الفترة اللى إحنا عايشنها سوا فقط وليس لجعلها دائمة لكن النهاية معروفة إن آجلاً أو عاجلاً فالنهاية المحتومة معروفة وسيحين وقتها ولكن متى يبقى ذلك فى علم الله ولا أعرف متى فهو وحده الذى يكتب الأقدار هو وحده الذى يعلم متى ينتهى الأمر لكن دعائى له الآن أنه إذا كان مقدراً لنا الإنفصال يعجل به لإنى لن أستطيع تحمل هذه الحياه كثيراً طاقتى بدأت تنفذ لم يعد عندى طاقة لإتحمل بها كل هذا العذاب والألم بمعنى أصح وصلت لمرحلة النضج أكثر من ذلك سأحترق إن ما تبقى منى ليس بكثير فقد إنتهيت وضاعت كل أحلامى وآمالى التى كنت أحلم بها وآمل أن تتحقق ضاع كل شئ ......

طعم المر

بقالى يومين حاسة بمرارة شديدة فى فمى وكل ما آكل حاجة أو أشرب حاجة ألاقيها مرة هى كمان مش هاكدب وأقول مش عارفة من إيه لا أنا عارفة من إيه كل المرارة دى من الكلام اللى هو قاله لى سمعنى كلام كان وقعه عليه أكثر من صادم قضى على الجزء الباقى من قلبى الجزء اللى كان فاضل بعد ما كسر قلبى من تسع سنين ودلوقتى أنا اللى فاضل فى قلبى الشرايين اللى بتضخ الدم للجسم علشان أعيش صحيح هاعيش ميتة من غير قلب لكنى هافضل عايشة لإنى للأسف اكتشفت إنى بخليه يحبنى بالعافية وده هو اللى قاله بلسانه مافيش حد بيخلى حد يحبه بالعافية وللأمانة قال ولا بيكره بالعافية بس إنتى بتخلينى أكرهك!! على إعتبار إنه كان بيحبنى وأنا بتصرفاتى بخليه يكرهنى . ده باختصار ملخص ما حدث بينى وبينه نأتى هنا لحقيقة الأمر ... فهو أصلاً لم و لن يحبنى فزواجه بى كان ارضاءاً لغروره فقط وما أن تزوجنا إنتهى ظهرت حقيقة مشاعره معى فكل شئ معى كان يفعله بدافع الشعور بالذنب ليس بدافع الحب بدافع ان يكون ضميره مرتاح حتى لا يشعر بتأنيب الضمير نحوى فكيف أكون زوجته وأم بناته وهو يخوننى فكيف أكون أنا أضحى بكل شئ حتى يظل البيت مفتوحاً وهو يقابل ذلك بالخيانة والكره تنازلت عن كرامتى وتحملت الإهانة والذل من أجل البنات والبيت وهو يقابل كل ذلك بهذا الكره .

دائماً يقولون أن الحب يولد الحب والكره يولد الكره ولكن هذا ليس صحيح فالحب ليس من الضرورى أن يولد الحب فمهما أحببت إنسان وهو لايحبك ليس من الضرورى أن يحبك حتى لو كنت تحت قدميه بالعكس لو أنت بتحبه وهو مش بيحبك ممكن يدوس عليك ويضعك هو تحت قدميه .

بس أنا للأسف فهمت ده متأخر أوى كان نفسى أفهمه بدرى شوية علشان كنت حافظت على قلبى كنت حافظت على كرامتى من الذل والإهانة التى أتعرض لهما على يديه ولكن للأسف لم أدرك هذا الأمر إلا من يومين فقط عندما دارت بيننا هذه المناقشة الحادة التى انتهت بى فى هذا الوضع المهين الذى أنا فيه لماذا يحدث هذا هو ليس عنده الشجاعة الكافية ليتركنى وأنا لا أريد ذلك لإنى أحبه و من أجل البنات ولكنه لا يفهم ذلك ولا أعرف إلى متى سنظل هكذا لقد تعبت و لا أستطيع العيش هكذا مع شخص أشعر بأنه لا يحبنى ودائماً يشعرنى بأنى ثقل على عاتقيه شخص يعطى مشاعره لإى أحد إلا أنا الشخص الوحيد الذى لا يستحق هذه المشاعر بنظره هو أنا لإنى المفروض أحمد الله على أنى متزوجة منه و أنه اختارنى من بين نساء العالم وتزوجنى وهذا يكفينى يا سلام ما كل هذا الغرور الذى يتمتع به لا أعرف .

عموماً فى النهاية أنا وصلت لنتيجة من كل هذا أنك " لا تعطى قلبك إلا لمن يستحق و إن لم تجده فاحتفظ بقبلك بين ضلوعك حتى لا تفقده للأبد " مثلما فعلت أنا !!!!!!!!  

ولذلك قررت الانسحاب فى هدوء حتى استعيد كرامتى وحياتى التى ضاعت صحيح أن هذا القرار أتى بعد فوات الأوان وبعد أن فقدت قلبى للأبد ولكن مش مهم المهم أن أستعيد كرامتى التى ضاعت فأنا لا أريد قلباً آخر حتى لا يضيع منى وأفقده ثانيةً.  

وراء كل إمرأة حزينه : رجل

وراء كل إمرأة محبطه : رجل

وراء كل إمرأة مترمله : رجل

وراء كل إمرأة معلقه : رجل

وراء كل إمرأة مطلقه : رجل

وراء كل إمرأة مجنونه: رجل

وراء كل إمرأة مھووسه بعمليات التجميل : رجل

وراء كل إمرأة ممنوعه من السفر للخارج : رجل

وراء كل إمرأة غير قادره على استخراج بطاقة احوال شخصيه : رجل

وراء كل إمرأة ممنوعة من العمل : رجل

وراء كل إمرأة يائسه : رجل

وراء كل إمرأة مكتئبه : رجل

وراء كل من ينكر هذا : رجل

و مع هذا وراء كل رجل عظيم ...! إمرأة

لخبطـــــــــــة

جوايا كلام كتير قوى ومش عارفة اعبر عنه لدرجة نى ببقى عايزة اقعد لوحدى فى أوضة ضلمة أبكى وأصرخ ، عندى احساس رهيب بالضياع أصعب شئ على الواحد انه يحس انه عايش لوحده بالغم من انه عايش مع ناس وبيتعامل معاهم بس هما فين منه أو هو فين منهم مش موجودين مع انهم قريبين جداً منه
نفسى الاقى حد يقرب منى ويهتم بيه زهقت من اهتمامى بالناس عايزة احس انى مسئولة من حد مش عارفة الشعور ده مسيطر عليه قوى اليومين دول حاسة دايماً بالخوف وعدم الأمان مش عارفة ليه عندى احساس انى بدور على حد ومش لاقياه ممكن لإنى مش لاقيه الشخص اللى المفروض يكون كل مشاعره معايا مش عارفة كل الحاجات دى مش لاقية لها سبب بس دى مشاعر متلخبطة جوايا .....
عارف لما تكون بتدور على حبيبك ومستنيه يجى ومش بيجى
لما تكون مستنى العيد وتلاقيه عند الدنيا كلها ومش عندك
لما تكون مستنى الدنيا فى فصل الربيع لكنها خريف قدام عنيك
لما تكون مستنى تسمع صوت عصافير وتلاقى وش فى ودانك
لما تكون نفسك تضحك وتلاقى قلبك بيتعصر من الحزن
لما تكون نفسك تبكى وتلاقى حتى الدموع عزيزة فى عينك
لما تكون بردان فى عز الشتا ومش لاقى حد يدفيك

فضفضة على ورق

لا أدرى ماذا أفعل معك لقد جربت كل شئ ولا شئ يجدى نفعاً ولا أعرف لماذا الحال هكذا بيننا جربت أن أحد من عصبيتى التى كنت أنت السبب الوحيد والأوحد لها لكى أرضيك - أرى وأسمع كل ما يجرح مشاعرى ويهين كرامتى ويجرحنى كأنثى وجعلت منى إنسانة بلا مشاعر وسلبت منى كل المشاعر الجميلة التى كنت أحلم بها قبل الزواج والتى كنت أتمنى أن أهبها لمن سيتزوجنى لإعيش معه حياة سعيدة خالية من المشاكل الكارثية ( وأقول الكارثية لإنى أعلم جيداً أنه لا توجد حياه خالية من المشاكل ولكنها تختلف باختلاف طبيعة الزوجين ) لكنك جعلت حياتى نفسها كارثة أتمنى أن أتخلص منها ولا أدرى ما الذنب الذى اقترفته حتى تعاملنى هذه المعاملة أو تتصرف هذه التصرفات معى لا أدرى ما هذا الذى تفعله سألت نفسى كثيراً ما الذى أقصر فيه هل أقصر فى واجباتى المنزلية ؟! هل أقصر فى واجباتى الزوجية ؟! أعرف كل نذواتك وعلاقاتك المتعددة ولا أدرى لماذا تفعل هذا بى ؟ ولن أسمح لك أن تحملنى ذنب هذه التصرفات وتقول لى انتِ السبب لإنه إذا كان عندى عيب محدد فصارحنى به إنك ترانى لا أتمتع بمقومات الأنوثة التى تراها فى غيرى ولكنى أقول لك اننى أتمتع بكل مقومات الأنوثة واستطيع أن أفعل كل ما تفعله الأخريات ولكن فى حدود الحلال والحرام ولكن معرفتى بكل ما تفعل جعلنى جامدة المشاعر عصبية المزاج وكما قلت لك تعامل معى على اننى أنثى وستجدنى أنثى ولكنك تضع دائماً المبرر لك لكى تفعل ما تفعله حتى انك لا تحاول أن تجرب مرة أن تتعامل معى من منطلق أنى أنثى حتى ترى المميزات الموجودة عندى حتى لا تشعر أنك تظلمنى لكن الله سبحانه وتعالى لا يرضى بالظلم الذى تظلمه لى ,,,

وختاماً أدعو أن يهديك ربى إلى صراطه المستقيم ليس من أجلى ولكن من أج بناتك اللاتى ما يزلن فى عمر الزهور وحتى لا تجنى عليهن بتصرفات الطائشة لعل ربى يجيب الدعاء

إهداء إلى أمى الغالية ....

وحشتينى جداً جداً محتاجة اشوفك قوى واقعد اتكلم معاكى زى زمان لما كنت اجى افضفض معاكى وانت بتسمعينى وبتغسلى كل همومى بمجرد ابتسامة منك ومسحة بإيدك على شعرى وبتهونى عليه كل الضيق والحزن اللى بحس بيه كنت دايما بمجرد الكلام معاكى بنسى كل اللى انا فيه او بحس بيه وجودك كان فارق معايا قوى فى كل حاجة ماكنتش بشيل هم اى حاجة بالعكس كانت كل حاجة بتهون مهما كانت عظيمة لمجرد انى حاسة انك موجودة معايا او جانبى اما دلوقت مش بلاقى حد اتكلم معاه واذا وجدت اشخاص اتكلم معاهم مش بحس بنفس الراحة اللى كنت بحسها معاكى لإنك الوحيدة اللى كنت بتستحملينى حتى لو انت تعبانة كنت بتخففى عنى من غير ما تضايقى .
هذا البوست إهداء إلى أمى فى عيد الأم .
الله يرحمها ويسكنها فسيح جناته ويجمعنى بها على خير .

ماتحسبوش يا بنات ان الجواز راحة .......

قبل ما اكتب البوست ده حبيت اعرفكم سبب تسمية المدونة ( ام البنات ) انا اتجوزت من 6 سنين وربنا رزقنى ببنت اول ما تجوزت وبعد 4 سنين حبينا نجيب لها اخ او اخت يونسوها ربنا رزقنا ببنتين توأم من حوالى 6 شهور وفجأة لاقيت زوجى العزيز بيقترح عليه ان احنا نجرب موضوع الخلفة ده تانى يمكن ربنا يرزقنا بولد طبعا انا سمعت كده كان هايغمن عليه بس تخطيت الصدمة بسلام وعرضت عليه انه يروح يتجوز واحدة تانية يجيب منها الولد لكن انا مش هافكر فى الموضوع ده تانى لإن ببساطة ربنا لو كان عايز يرزقنا بولد كان رزقنا به فى اى مرة من المرتين او على الأقل فى المرة التانية بدل ما رزقنا ببنتين مرة واحدة كان رزقنا بولد وبنت واغلقت الكلام فى الموضوع ده خالص وده كان السبب اللى خلانى اسمى المدونة بهذا الاسم بالغيظه فى جوزى .

ماتحسبوش يا بنات ان الجواز راحة .......

معظم البنات قبل ما تتجوز بتبقى فاكرة انها لما تتجوز هاترتاح وانا كنت من ضمن البنات دول وبقول انا كنت لإنى والحمد لله ربنا كرمنى واتجوزت . كنت فاكرة انى لما اتجوز هاعيش حياتى زى ما كنت بتخيلها حياه خالية من المشاكل العويصة اللى مش ليها حل ما هى المشاكل نوعين مشاكل مقدور عليها وهى المشاكل اليومية اللى بيتعرض لها كل بيت فى مصر يعنى بتبقى عادية ( مصروف البيت – مستلزمات الأولاد ومشاكلهم ) والمسئولية اللى بيشلها أى اتنين بيتجوزوا والنوع التانى من المشاكل بعيد عنكم وعن السامعين والقارئين مش بيبقى لها حل ودى بتكون متمثلة فى طبع الرجل اللى متجوزاه لإنك اذا متعودتيش على طبعه واتأقلمتى عليه مش هاتقدرى تكملى معاه ومن ضمن هذه المشاكل إصابة الرجل بداء معين مثل ( الكدب – الإسراف – عدم اكتفائه بزوجته - .....) ويا سلام لو ربنا قدر لك انك تتجوزى واحد عنده عقدة انه كان بيحب واحدة وسابته بتبقى كارثة وذلك على سبيل المثال لا الحصر نبدأهم داء داء :
الكدب : الرجل اللى عنده داء الكدب بيخلى حياة زوجته جحيم لإنها بتفقد الثقة فى كلامه حتى لو بيقول الصدق لأنها كانت بتصدقه فى اول جوازهم ولما بينكشف لها كدبه اكتر من مرة خلاص بقى مش بتصدقه تانى والمصيبة انه بيبقى عارف انها عارفة انه بيكدب ومش مصدقاه وعلى الرغم من كده بيستمر فى كدبه وطبعا هى عايشة فى جحيم لأنها بتبقى عارفة انه بيكدب عليها وبتضطر انها تطنش وتعمل مصدقاه علشان تخف من كم المشاكل اللى بيسببها اكتشافها لكدبه لإن هو كرامته بتوجعه اوى لما يعرف ان مراته كاشفه كدبه وللأسف الداء ده مش له علاج وإلا كانت فى زوجات كتير عرفت تعالج ازواجها .
الإسراف : والداء ده للأسف برضه مش له علاج لإن الزوج بيبقى مسرف فى الحاجات اللى تخصه بس يعنى مثلاً عجبته حاجة وعايز يشتريها عنده استعداد يستلف لو مش معاه تمنها علشان يجبها لكن لو زوجته طلبت منه شئ عندها تظهر الأمثال الشعبية اللى بنسمعها كلنا فى الأوقات اللى زى دى مثلاً ( العين بصيرة والإيد قصيرة – واللى مايشوفش من الغربال يبقى اعمى – الجملة المشهورة قوى من كل الأزواج انا نفسى اجيب لك كل حاجة بس على يدك اعمل ايه اسرق يعنى ..... ) وجمل كتير فى هذا الإطار .
نيجى بقى لأكبر كارثتين ممكن تتعرض ليهم البنت لما تتجوز وهما عدم اكتفاء الرجل بزوجته او يكون كان بيحب واحدة وسابته وهو ماقدرش ينساها والحياة الزوجية لو تعرضت للمشكلتين دول بتبقى على كف عفريت وبتبقى عايزة نوع خاص من النساء علشان تعدى بالبيت لبر الأمان لإن الراجل مش بيبقى فارق معاه خراب البيت لإنه لو كان بيفكر فى البيت مش كان عمل كده من اساسه . لكن نقول ايه رجاله مريضة بعيد عنكم .
وبتبقى صدمة العمر بالنسبة للزوجة وخصوصا اذا اكتشفت ان زوجها بيخونها مع واحدة تانية ولسه ماعداش على جوازهم اكتر من سنة حتى لو كانت الخيانة دى عن طريق التليفون ( يكون بيكلم واحدة فى التليفون وما الى ذلك ) تلاقى الرجل من دول اذا ربنا شاء انه يكشف امره لزوجته وتيجى تواجه تلاقيه بقى 75 رجل فى بعض من زعيق وانفعال واستنكار من ازاى تفكر بس مجرد تفكير انه بيعمل حاجة زى كده .
وتلاقى الرجل من دول مش بيعجبه العجب ولا الصيام فى رجب اذا زوجته دققت على كل حاجة فضلت تسأل على كل حاجة ما هى طبعا فقدت الثقة فيه تبقى بتخنقه واذا فوضت امرها لله وكبرت دماغها واستعوضت ربنا فى عمرها تجنبا للمشاكل تبقى كبرت دماغها عنه وبقى مش فارق معاها بس الزوجة اذا كانت بتعمل كده فده لأنها مش ناقصة مشاكل كفايه اللى عندها ولما يكون الرجل بيقول ان لو هو مش عايز يبطل الموضوع ده من نفسه يبقى مافيش حد هايقدر يخليه يبطله يبقى المطلوب من الزوجة انها تعمل ايه بقى ؟؟؟ كفاكم الله شر هذا النوع من المشاكل.